حوار مع نحـنوح مصر الأول

المسبلاتي .. المسهوك حوار مع نحـنوح مصر الأول

إيـفون نبيل : بانوراما عربية معانا .. المسبلاتي .. المسهوك .. نحنوح مصر الأول.. نجم الـgel  ..عفوا نجم الجيل .. صاحب أطول شعر صدر في الوسط الفني .. ومحطم الرقم القياسي في موسوعة جينس ريكوردز لكثافة الحواجب .. كل البنات تحضر نشادر قبل ما يغمى عليها من الفرحة .. معانا الفنان السهتان .. كااااااااامل مرسي:   كامل: ربنا يخليكي أنا نفسي آآآآآآآ..... آآآآآآآآآ.. أأأشكركم المذيعة "تمسك بحذاءها ويبدوا أنها ستخلعه": وأنا كمان نفسي آآآآآآآآآآآآ.. كامل: انتي فاهمة؟ المذيعة: مصر كلها فاهمة يا اخويا كامل: طب خلاص هتلم المذيعة: أنا سمعت إن في بنت رمت عليك هدية غريبة وانت عالمسرح كامل: دي حاجات خفافي كده .. يعني واحدة ترميلي خاتم ..، واحدة ترميلي "تييييييييييت"، كل واحدة ومقدرتها، يعني أنا مش باشترط حاجة محددة يعني. المذيعة: وانت بتعمل إيه بالتيييييييت اللي بيترموا عليك دول؟ كامل: أنا أصلا فاتح لأخويا الكبير بوتيك اتنين ونص .. وبيقلب رزقة في الحاجات التيييييت دي. المذيعة: بس أنا سمعت إنك بتأجر البنات اللي بيطلعو يترموا عليك عالمسرح دول؟ كامل: لا كده عيب بجد .. دول بنات ناس المذيعة: بنات ناس إيه وانت بتحضنهم وتبوسهم على المسرح؟ كامل: منا زي أخوهم الكبير .. عادي يعني مفيهاش حاجة .. وبعدين أنا متفق مع الأمن هو حضن وبوسة واحدة وييجوا يشيلوا البنت .. عمرك شوفتيني زودت عن كده؟. لدرجة إني دلوقتي مش باحتاج الأمن .. البنت من دول تطلع تاخد بوستها وحضنها وتنزل من نفسها. المذيعة: ما شاء الله .. تحب تسمع إيميلات المعجبين بيقولولك إيه؟ كامل: حبايبي .. يا ريت تقرأ المذيعة من ورق أمامها..   المذيعة: نسمة باعته تقولك .. أنا باحبك يا كامل .. وعلى فكرة أنا كبرت خلاص .. وبقيت أطول أكرة الباب .. وماما بطلت تحميني وبقيت أعتمد على نفسي ... بليييييييز اتجوزني بقى أنا باحبك قووووووووي. كامل: حبيبة قلبي .. بحبك يا نسمة. المذيعة: ومعانا إيميل تاني من محسن باعتلك كلمات أغنية جديدة وبيتمنى يسمعهالك. كامل: أنا باحب أشجع الناس الجداد دول. المذيعة: بيقولك .. كل مرة أشوفك فيها ابقى نفسي اقولك حمرا ... حمرا جدا يالخدود اللي على بنوته سمرا .. حمرا حمرا .. حمرا حمرا. كامل: ياااه دي أغنية جواها معاني عميقة، أنا فاهمها كويس. المذيعة: انت بيتهموك بأنك أفسدت الذوق العام للجيل؟ وبتغني أغاني ليها إيحاءات مش ولا بد؟ كامل: عادي منا شاب زي أي شاب وليا قلة أدبي وسفالتي. المذيعة: بس متنكرش إنك هربت من خدمة وطنك. كامل: منا عملت 3 أغانى للبلد .. ومحاسب الآلاتية من جيبي .. هي مصر عاوزة إيه أكتر من كده؟ المذيعة: طب معانا اتصال من سارة قول ألووو ص .. سارة: الووو كامل: الوووو ص .. سارة: أنا مش مصدقة إني باكلمك .. إحلف إن إنت كامل مرسي. كامل: والله أنا كامل مرسي بشعره وحواجبه ولا انتي شايفة آآآآآآآآآآآآ؟ ص .. سارة: أنا مش مصدقة نفسي .. أنا بموت فيك وكل يوم أتخانق مع ماما وتشد شعري وتمرمغني عالبلاط وتنعل سلسفين اللي جابوا أهلك .. المذيعة: ليه كده يا سارة؟ تتحدث سارة بسعادة شديدة: لأني سقطت والله العظيم علشان خاطر كامل .. ودي أقل حاجة اقدمهاله .. بعد التاتو اللي دقيته باسمه على سمانة رجلي. المذيعة: في نهاية اللقاء أحب أعرف لو هتموت بكرة .. إيه الحاجة اللي هتعملها؟ كامل "تبدأ عينه في إفراز الدموع": أنا عارف إني مش قريب من ربنا .. لو هموت بكرة .. هاعمل أغنية اسميها ارحمنا برحمتك يا رب .. وسامحني على كل اللي عملته ده .. أيوه ده .. وهنزلها على نجوم إف إم .. وهخلي الممثلة لينا تصورها معايا على البلاج بس بالاسدال .. وأنزلها كول تون. المذيعة: ده كل اللي هتعمله لو هتموت بكرة؟ كامل: لا طبعا .. لازم أعمل حاجة مهمة المذيعة: أيوة قول واعترف كامل: أنا .. أنا .. لازم أخلص رصيدي .. لأني لسه شاحن بمية.